陳庭宣﹝A-hi﹞是我佇真理大學台文系教冊時教過的學生，會記之課的時，伊交出來的作業就是台語詩，別人交華文，伊交台文，予我誠深刻的印象。我佇課堂內特別提出這件代誌，唸庭宣的詩予歸班學生聽，鼓勵大家愛學習庭宣，開始台灣話文的寫作，尤其台灣白話文﹝台語散文﹞自戰後寫的人就卡少，若是有興趣，加減寫寡仔散文，對戰後台語文學有可能做出淡薄仔貢獻。

佇真理讀冊的時陣，庭宣就開始創辦台文刊物，啪拚學習台文，寫出真濟作品，其中予我印象尚深、感覺尚嶄的，是用台灣植物做主題的散文，親像收佇這本冊內底的〈苦瓜人生〉、〈葡萄雨〉、〈油菜花的心事〉、〈Nai-chi樹跤〉、〈六月鳳凰樹〉等等，攏是台語文學一般的卡少處理過的題材，苦瓜、葡萄、油菜花、Nai-chi、鳳凰樹，是咱台灣常見的植物，是參咱台灣人日常生活尚蓋親近的植物，庭宣毋na寫出in的特性，而且配合人的故事，寫出台灣民間社會、台灣人的特質。我認為這款的散文，不只是台語散文，ma會thang講是台灣人的散文。

用植物做主題，專工描寫台灣植物的特色，這是替咱台語文學栽新欉的功課，庭宣佇〈雜菜園〉這篇文章內底有提起，讀大學了後，伊開始「拈花惹草」，對花草誠有趣味，伊落感情佇花草的栽培面頂，種出一座雜菜園出來；我想，這是伊會thang寫出chia濟好的台灣植物散文的原因，有心有情，就會出好風景，這本台灣話文集，當然ma是用仝款的心情寫出來的。伊用心掖台灣話文的菜籽，央望台語文學的大花園，菜籽落塗，總是有一工會開花！

我真歡喜會thang看著庭宣出的第一本冊，是用台灣的花草做主題，用伊的種作「雜菜」的經驗做根柢，寫出台灣的塗氣、芳味。台語文學的創作，有像庭宣這款對台灣花草植物落筆的作家出現，題材就會擱加開闊，台語文學的田園就會擱加美麗。
這本《葡萄雨》是一個sui氣的起步，庭宣已經用伊的作品寫出台語散文的新欉。

2005/07/05南松山